புரிந்ததா?

எதிலும் லயிக்காத
இலவம் பஞ்சாய் மனம்
இலக்கிலாமல் ஓடி ஆட
இலக்கில்லா வேதனையில்
ஆழ்மனம் தேடிவாட....
எதில்தான் லயிக்கும்
என ஆறறிவு கேள்வி கேட்க......
தேடலின் சுமையொடு
தூங்கா விழிகள் ..............
வேண்டாம் என அறிவு மாற்றி வைக்க ,
வேண்டும் என இதயம் இரங்கி நிற்க,
ஆம் இல்லை என மனம் பிரித்து பேச ,
தேடலின் விடையாய் ..........
என் சிரிப்பின் விலையாய்...........
அருகிலேயெ இருப்பினும்
நெடுந்தூரப் புள்ளியாய் நீ..............
என் தேடலே
தேடல் புரிந்ததா இப்பொதாவது?

மௌனம்

என்னவெல்லாமோ பேச
என்னை முனைபடுத்தியிருந்தேன்.
நேற்று பூத்த முதல் ரோஜா.....
முகத்தில் விழுந்த முதல் மழைத்துளி......
என்னிடம் புன்னகைக்கும் அந்தக் குழந்தை.....
பார்த்தவுடன் வாங்கிய பிரிய சேலை.......
பாதி மட்டுமே நினைவில் உள்ள நாமிருந்த கனவு......
மனதறியாமல் நோகடிக்கும் நிகழ்வு.......
வாழ்ந்தேகாட்டுவேன் என நான் எடுத்த முடிவு.........
வாங்க நினைக்கும் அந்த குட்டி நாய்குட்டி......
என பட்டியல் போட்டுத்தான் வந்தேன்,
உன் முகம் பார்த்ததும்..
புரிதலுடன் கூடிய புன்னகை கண்டதும்...
சொல்ல வந்ததெல்லாம் சொன்னாற்போல்...
ஓர் உணர்வில்,
வார்த்தைகளே இல்லா வார்த்தைப் பரிமாற்றத்தில் நாம்!

மனமும் புற்றும்

உள்ளே உறைவது
யாதென அறியா
பயத்தில் பால் வார்க்கும் மக்கள்.....
எறும்புகள் ஊறும்,
இல்லை,
வெற்றிடமாய் வெளிறும்......
எறும்பு மொய்த்த
வெற்றிடத்தில்,
சீறும் நாகம்
உறங்கக் கூடும்!
உள்ளிருப்பது என்னவென்று
வெளிப்படுத்தா விதத்தில்
மனமும் புற்றும்.....
விடமுடைய பாம்பின்
உறைவாய்......
விடத்தையும் விஞ்சும்
எண்ணங்களின்
உறைவாய்......
மனமும் புற்றும்.......
மனமெனும் புற்றும்.......

நினைவு

எங்கோ ஒலிக்கும்
ஒரு சிரிப்பொலி
யாரோ சொல்லும்
ஒரு வார்த்தை
தூரத்தே தெரியும்
உடையின் நிறம்
என்றோ படித்த
வரிகளில் நினைவு
இதில் எல்லாம்
தெரியும் உன்னை
மறக்கத்தான் முயல்கிறேன்......
எனினும்
உன்னுருவாய் என்னருகே
வந்தமர்ந்து
உன் கண்ணால் எனை நோக்கும்
நம் கண்மணியை
காணும் போதெல்லாம்
கல்லாய் வந்து அடைக்குதே
உன் நினைவு
அதை எங்கணம்
களைய சொல்?

ஸாமா ராகம்

சாமா ஒரு அழகிய ராகம்.
இதில் மூன்று திரைஇசை பாடல்கள் உள்ளன.
மூன்றும் வித்யாசமான அருமையான பாடல்கள்
1.நான் பாடிகொண்டே இருப்பேன் ----சிறை
2.மௌனத்தில் விளையாடும் மனசாட்சியே----நூல்வேலி.
3.மானஸ ஸஞ்சரரே-----சங்கராபரணம்.
மூன்று பாடல்களிலும் உள்ள அழகை இனிமையை உணர்ந்து ரசிக்கலாம் வாங்க!

அன்புக்கும் அளவு!!

உன் மீது நான் கொண்ட
அன்பின் ஆழம் கூற
கடலும் ஆகுமோ ஓர் அளவு
இலலை
வானமும் வணங்குமோ பெரிதளவு!!
உழைக்கும் மனிதனின்..
வேர்வையின் மதிப்பு...
தன்னம்பிக்கை கொண்டவனின்
மனதின் செழிப்பு...
தன்மானம் காத்திடும்
ஒருவனின் செருக்கு.....
உண்மையே உயிரெனக்
கொள்பவனின் மிடுக்கு...
இவை யாதிலும்
பெரிதெனக் கூறுவேன் யான்......
இதனினும் மேலாய்
அறியவும் வேண்டினால்
கூற்றுவன் வந்தெனைக்
கவரும் காலை.....
உன் மீது நான் கொண்ட
என் அன்பு மட்டும்
விட்டு விலகா நாய்குட்டியாய்
சுற்றிடும் உன் காலை....
என் அன்பின் ஆழம்
உணர்வாய் அவ்வேளை!

கிளைக்கும் மனம்

அழிக்க இயலா

எதிர்த்துக் கிளைக்கும்

மண்புழுவாய்

என் மனம்!

யாரேனும் சிதைக்க விரும்பி

பாறையைப் போட்டால்......

கீழே மண் பறித்து

சந்ததி வளர்க்கும்!

வெட்டு ஒன்று துண்டு இரண்டென

வெட்டியும் போட்டால்......

வாலுக்குத் தலையும்,

தலைக்கு வாலும்,

தழைத்து வளரும்!!!!

தன்னுள்ளே

ஒரு கணம் ஆணாய்.....

மறுகணம் பெண்ணாய்.....

ஆதிக்கம் நடத்தும்!

ஒழிந்தது சனியென

மறந்திடும் வேளை,

சிறு துளி மழை விழ

சிலிர்த்துச் சீறும்!

ஆக

அழிக்க இயலா.....

நிலைத்து வாழும்

மண்புழுவாய்

என் மனம்

பிழைத்து நிற்கும்!

பாழும் மனம்

உன் நினைவலைகள்
அடித்து அடித்து
மனமெனும் கடல்
பொங்கித்தணியும்!

பாலைவனக் கடலென

உண்மை உரைக்க

சிறுதுளி தேடி

கண்கள் அலையும்

வேண்டா வேண்டாமென

ஒரு மனது கூற

உன் மடி நாடி

உள்ளம் விழையும்

உடைந்த இதயம் தான்

மிச்சமென உணர்ந்தும்

உன் தோள் சாய

பாழும் மனம் ஏங்கும்

உள்ளொன்று வைத்துப்

புறமொன்று பேசும்

கல்லான நெஞ்சம்,சொல்

என்றுதான் மாறும்?

வேறொன்றும் நினையாமல்

என் காதல் உணர

பொத்தி பொத்தி வைத்த

பூ அன்று தான் மல்ரும்.

உன் வாழ்க்கையோடை

என் எண்ணப்படகு கொள்ள

ஆண்டாண்டாய் சேமித்த

என் ஆசை தீரும்.

ஒரு முறையேனும்!!!

நான் உன்னைக்
கனவில் மட்டும்
கண்டு களிக்கிறேன்
நீ நனவில்
என் அருகில்
இருப்பதறியாமல்!
என் கனவினைக்
கலைக்க மனமின்றி
நீ கடந்து மறைகிறாய்
மேகமாக......
நீ நனவாய் வந்ததை
கனவென எண்ணி
களிக்கிறது மனம்
கனவோ நனவோ
ஒரு முறையேனும்
கொஞ்சம் வந்து செல்........
ந்னவாகும் கனவு
நான் காண நாளும்.

பொங்கல்

வெறுப்பு
வேதனை
அழுகை
ஆர்ப்பாட்டம்
அனத்தல்
அருவருப்பு
புறங்கூறுதல்
புண்ணாக்குதல்
இவை அனைத்தும்
பெரு நெருப்பாய் எரியும்
போகியில் இட்டு
சிரிப்பு
சிந்தனை
பகிர்தல்
பக்குவம்
அணைப்பு
ஆனந்தம்
அமைதி
அன்பு
பொறுப்பு
பொறுமை
என.........
மங்கலமாய் மனதில்
பொங்கட்டும்
பொங்கல்

அது போதும்

அன்னை அருகில் இல்லை,
அண்ணனோ அமையவில்லை,
தங்கையின் வாழ்வுமுறையில்
தங்கிச்செல்லவும் நேரமில்லை!
தந்தை தன் உலகில்,
தம்பியோ தன் போக்கில்,
தானாய் அமைந்த
நண்பர்கள்
நிமிட நேர மாயவலை!
இதில் எப்படி நான்
எங்கிருந்தோ வந்த நீ மட்டும்
என் உணர்வும் உயிரும்
தொட வேண்டுமென நினைத்து
மருகி மருகி உடைதல் நியாயம்?
கண்ணீர் துடைக்க
ஒற்றை விரல் நீள வேண்டாம்.........
எதிர்பார்ப்பு கொல்லும் மருந்து
எங்கேயாவது இருந்தால்
மட்டும் சொல்! போதும்!